Ыам ыйын 16 күнүгэр Тимофей Сметанин аатынан улуустааҕы библиотека ааҕар саалатыгар саха поэзиятыгар сүгүрүйээччилэри, биир дойдулаахтарбыт айар үлэлэрин сэҥээрээччилэри кытта истиҥ көрсүһүү буолан ааста. Биһиги көрсүһэр түгэммит, идэтинэн учуутал, үлэтинэн суруналыыс, дууһатынан-сүрэҕинэн поэт Григорий Григорьевич Кобяков 75 сааһыгар анаммыт ахтыы тэрээһинэ буолла.
Тэрээһиммит күндү ыалдьыта – биһиги бары билэр, күннэтэ көрсөр киһибит, Григорий Григорьевич улахан кыыһа Галина Григорьевна Кобякова уонна Григорий Кобяковы кытта улуус хаһыатын редакциятыгар бииргэ үлэлээбит коллегата – Ирина Михайловна Слепцова буоллуллар.
Григорий Григорьевич суруналыыс, суруйааччы эрэ буолбакка, кини дьону көҕүлээччи, тэрийээччи буоларын, ис-иһиттэн сырдык дууһалаах буолан духуобунай баай, айар айылгылаах, олоххо, үлэҕэ сыһыаннарынан холобур буолар дьону кытта алтыһарын, кэпсэтэрин, санаа атастаһарын олус астынарын иһиттибит, биллибит. Талааннаах, айылҕаттан айдарыылаах, бары өттүнэн сайдыылаах учуутал, поэт, суруйааччы, журналист, баай дууһалаах киһи, үгүһү да эрэннэрбит биир дойдулаахпыт Григорий Кобяков туһунан истиҥ тыллаах ахтыылары истэн, айымньыларын ааҕан, ырыаларын долгунугар бигэнэн, ыллаһан авторы бэйэтин кытта көрсүбүт, кэпсэппит кэриэтэ сананныбыт.
“Поэзия – киһи саныыр санаатын үрдүк чыпчыыла, киһи өйүн өрөгөйө” диэн үрдүк сыанабыл этиллибитинии, айар үлэ Григорий Кобяковка “сүрэҕин муудараһа” буолан, иэйиини кытта санаа тэҥинэн кыттыһан үйэлэргэ өлбөөрбөт айымньылары хаалларбыта. Поэзия – литература тыына, онтон суруйааччыга хоһоон – кини дууһатын кистэлэҥэ, өйүн-санаатын кыната…
Кыраайы үөрэтэр салаа специалиһа Л.Попова
Поделиться ссылкой:
