Кэбээйи улууһугар уон тохсус төгүлүн ыытыллар «Үс өрүс тардыылаах, уу чалгый куттаах Кэбээйигэ – Саха Сирин тэбэр сурэҕэр» Олонхо ыһыаҕын чэрчитинэн от ыйын 3 күнүгэр киэһээ 6 аҥаар чаастан «Сайдам» норуот айымньытын киинигэр Саха норуодунай суруйааччытын, Россия Суруйааччыларын союһун үрдүкү айар сэбиэтин чилиэнин Николай Алексеевич Лугиновтыын «Таас Тумус күөнүгэр» бырайыак тула кэпсэтии киэһэтэ буолан ааста.
Аһаҕас кэпсэтиигэ кытыннылар: Рустам Каженкин, Россия Суруйааччыларын союһун чилиэнэ, П.Ойуунускай аатынан Литературнай түмэл директора, Герасим Васильев, Саха Норуолунай артыыһа, ССРС, СР А.Е.Кулаковскай аатынан судаарыстыбаннай бириэмийэлэр лауреаттара, Евдокия Избекова, филологическай наука кандидата, СР П.Ойуунускай уонна В.В.Никифоров – Күлүмнүүр аатынан судаарыстыбаннай бириэмийэлэр лауреаттара, Анатолий Слепцов, Россия Суруйааччыларын союьун чилиэнэ, Волошин аатынан аан дойдутааҕы уонна Российскай литературнай бириэмийэлэр лауреаттара, Николаев Дмитрий Иванович, Кэбээйи улууһун бочуоттаах олохтооҕо, Арыктаах нэһилиэгин ытык кырдьаҕаһа.
«Таас Тумус күөнүгэр» бырайыак көлүөнэлэр ситимнэрин бөҕөргөтөр, П.А. Ойуунускай нэһилиэстибэтин тарҕатар уонна Саха сиригэр суолталаах сирдэр устуоруйаларын өйдөбүлүн харыстыыр соруктааҕын бэлиэтээтилэр.
„Таас Тумус күөнүгэр“ биэриигэ ис сүрэхтэн уһун үйэлээх эфири, быстыбат иэйиини уонна бэриниилээх көрөөччүлэри баҕарабыт. Саҥаттан саҥа экспедиция саха норуотун улуу устуоруйатын сонун сирэйдэрин арыйан истин, төрөөбүт дойду дорҕооно тэлэбиисэр экранын нөҥүө күнтэн күн күүһүрэн-уоҕуран иһилиннин! Чэгиэн туругу, айымньылаах ситиһиилэри уонна этэҥҥэ буолууну баҕарабыт!
Майя Обутова, кыраайы үөрэтэр салаа сүрүн үлэһитэ
Т.Е.Сметанин аатынан Кэбээйитэҕи улуустааҕы библиотека
Поделиться ссылкой:
